WAAHILOOTA SADEN BAHANII HAFAN!!!

WAAHILOOTA SADEN BAHANII HAFAN!!!

Urjii Ahmad

 

Asoosama gabaabaa!

Ganama tokko Waahiloonni sadeen wajjiin manaa bahan. Yeroon yeroo Gannaa tan boqonnaa turte. Isaanis wajjiin Bosona Nannoo Isaanii daawachuuf, Uumaa Rabbii laalanii dinqisiifachuuf karaa seenan.

Bosona ganda Isaanii bineensoota bosonaa hedduu jira. Khuruphoo, Solooliyaa, Gafarsa, fii Satawwaan ni argaman ammo yoo bosona keessa chi fagaatan Qirreensillee akka jiru maanguddoonni ni dubbatan. Akkasuma Boofa guddaa Hubaabaa jedhamu kan Mukni irratti meeyreetu bosona walakkaa jira waan je’amee dubbatamuuf walakkaa keessa dhaquuf namni yaalu hin jiru.

Hundi Ilmaan ganda tokkooti. Joollummaarraa wajjiin guddatan Abbaan Jamaal Sheekha beekkamaadha, Inni ganda keessatti warra diin nama barsiisuuf jiruu isaa kennerraahi. Ahmadoon ammoo abbaan warra Awoliyaa jechuun beekkaman. Shanyiin Isaanii akka gosa Rabbi biraa kophatti sadarkaa qabdutti laallaman. Warri baadiyyaa guyyaa saftii aannan, lukkuu, killee, dhadhaa, ra’ee fidanii isaan ziyaaranii qarxaasa fudhatanii deebi’an. Hoggaa Moolida godhan warri baadiyyaa fagoo hedduutu dhufa, kan horii fidee kodhaa Isaa kennatu hedduudha. Ammatatti yeroo killa godhan qaban, jolleen isaanii guyyaa sadi manaa hin bahan. Abbaan Ahmadoo Sheekh Abdusalaam abbaa Jamaal Wahbiyyaadha jechuun Ilmi Isaa Ahmadoon akka mana Isaanii hin dheynee fii akka waahilummaa Jamaal wajjiin dhaabu akeekkachiisaa ture. Garuu Isaan mana barnootaa waan waliin barataniif waahilummaa Isaanii itti fufanii jiran. Magarsaan ammoo ilma barsiisaati. Abbaan Magarsaa Ortodoksiidha ganama Alhadaa hunda beetakiristaana dhaqee tsalootii godha. Gaafa tokko Jamaal Waahila Isaa Magarsaa waliin Osoo waa'ee amantii waliin haasawanii Magarsaan "Iyaasuus Waaqa" jechuun itti falme. Jamaal Falmii dheertu Isa wajjiin eega godhe "Kaaseeta tokkon siif fidaa dhageefadhu" jedheen. Magarsaan tole naaf fidi "Iyasuus Waaqa tahuu hin shakku" je'eenii addaan bahan. Ganama Jamaal Kaaseeta Ustaaz Qamar Husseen (dhugaa Iyasuus waaqaa) kan je'uu fii kan Sheekh Ahmad Didaat Afaan Amaaraatti kan hiikkame itti kenne. Magarsaan Kaaseexa fuudhee mana Isaanii geeysee itti bane. Yeroon Isaa galgala waan tureef Abbaan Magarsaa, Haatii Magarsaa obboleyyan hundi achuma jiran. Kaaseexa Qamar Husseen hoggaa laalan Abbaan Magarsaa Matsaaf Qudusii ykn (Macaaf Qulqulluu) Isaa baasee hordofaa ture. Haati Magarsaa Warqinash "Basma Aab" jettee kaatee kutaa biraa seente. Abbaan Magarsaa eega laalee xumure "Kaaseexa kana eeysaa fidde" jechuun Magarsaa gaafate. Magarsaan rifatee "Waahila kiyyaatu wal falamnee jannaan laali jedhee natti laate" jedhan. Abbaan Magarsaa "Waggaa 57 if gawwoomsaa ture jechuudhaa!!!" "Akkamitti kuni taha?!" "Macaafa Qulqulluu keessa kuni hundi Jira jechuudha?!" "Waan nama dinqu abbee!!!" Ani Amantii koo arrarraa Islaamatti jijjira je'ee Maatii Isaa Rifachiise. Magarsaan "Way Osoon fiduu baadhe" jechuun gaabbee if jibbe. Abbaan Magarsaa ganama Sheekh Abdusamad Bira dhaqee Masjidatti Shahaadaa qabatee Islaamatti seene. Maatii Isaaa Islaameeysuuf yaali guddoo godhuu itti fufe garuu namni Isa dhagaye hin jiru. Abbaan Magarsaa yeroo gabaabduu keessatti Islaamummaa dubbisuu fii Sheekha Irratti barachuun hubate. Quraana Juza 10 haffazee, Kitaaba gurguddaa Hedduu dubbisee ifiifuu da’waa godhuutti seene garuu Maatii Isaa keessaa Magarsaa fii Haatii Magarsaa Islaamummaa fudhachuu didan. Jolleen biro hundi Isaaf Islaamawanii jiran. Magarsaan xiqqo turee Ortodoksii irraa Pheenxee seene.

Waahillan sadeen waliin gama bosona daawannaatti adeemaa jiran. Gaara guddaa ganda Isaanii ol bahuutti jiran. Osoo haasawaa koflaa gama gaaraa ol dhiibbatanii wanni hin yaadamin argame.

Ahmadoon Abbiyyoooo!!!! Abbiyyoo Kiyya!! Nabii kiyya! na dhaqabi jechuutti seene.

Jamaal Yaa Rabbi! Yaa Allaah! Laa Ilaaha Illallaah! jechuun quba takka gama Samii ol qaba.

Magarsaan "Bayyasuus sim! Iyaasuus! Goftaa koo! Maaloo jechuun lallaba.

Osoo gama gaaraatti ol bahaa jiran dhagaan guddaan gararraa konkolaatee Isaan sadeenuu fuudhee gaara jalatti deebise. Hundi dhiigaan badanii Aadan, ni iyyan, hundi waan gabbaru yaammachuutti seene.

Ahmadoon Abbiyyoo!! Nabiyyii!! na dhaqabi osoo je'uu hunda dura lubbuun Isaa baate.

Magarsaan Iyyasuus goftaa koo ilma waaqayyoo maaloo maaf na ajjjeefta, maal badiin koo?! osoo jedhuu Ruhiin Isaa keessaa baate.

Jamaal Yaa Allaah!!!! Laa Ilaaha Illallaah! Yaa Rahmaan! Osoo jedhuu namni karaa deemu gaara jalatti sagalee dhagayee itti gore, hoggaa fiiganii dhagaa jalaa fuudhan humaa hin dubbatu, Hafuura dhumaa baafatee jira.

Ganda tokkorraa guyyaa tokkotti Waahiloonni sadeen bahanii hafan, bosona daawwachuuf bahan reefki Isaanii gale. Gandii guutuun bahee Isaan awwaale Ahmadoo fii Jamaal Qabruma takkatti Lahdii adda godhanii awwaalaman. Magarsaan Qabrii Pheenxeetti Isaaniin adda bahee awwaalame. Adunyaarratti sadeen addaan hin baane duuti addaan baafte.

Abbaan Magarsaa akka malee booye "sabbari" hoggaa je'aniin "Way Osoo Shahadaa qabatee du'e maal qaba? saniifin booya" jechuun imimmaan dhangalaasa.

Waahiloonni sadeen bahanii hafan. Hundi Isaanii bosona laallee deebina jechuun gaara guddaa sanitti ol dhibbataaa turan, san dura hogga hedduu bosona san daawwatan. Garuu taraa tana hin deebine.

...........................

Kamtu Warra Milkiiti jettee yaadda???