ZIYAARAA QABRIITII FII KIJIBA AHBAASHII

ZIYAARAA QABRIITII FII KIJIBA AHBAASHII 

 Urjii Ahmad

Ahbaashiin kijiba malee wanni dhugaa Isaan bira hin jiru. Kijibaa fii maqaa Ulamaa’ii xurreessuun aadaa Isaaniiti.

Kijiba Isaanii keessaa tokko Ziyaaraa Qabrii warra dhorguu jira, Isaan Wahbiyyaadha jechuun Oduu afuufuudha.

Ziyaaraan Qabrii Shari’aa Islaamaa keessatti Rasuulaan s.a.w karaa godhamee jira.

Rasuulli s.a.w “Qabrii Ziyaaraa du’a Isin yaadachiifti” jechuun akka qabrii Ziyaarru karaa nuuf godhee jira. Rasuulli s.a.w Qabrii Ziyaaraa jechuutti osoo hin dhaabbattin yeroo Qabrii Ziyaarru maal akka jennus nuuf addeessee jira. Wanni hoggaa qabrii dhaqe Inni s.a.w godhaa ture Muslimoota du’anii fii kan jiraniif Rabbi kadhachuudha. Akhiiraa yaadatanii duniyaaf bololuu dhiisuudha.

Ziyaaraan Qabrii lamatti qoodama:

1. Jaalatamaa (karaa godhamaa).

2. Jibbamaa (irraa dhorgamaa).

1. Jaalatamaan (karaa godhamaan) kan Rasuulli s.a.w karaa godhe. Karaa Rasuulaa s.a.w osoo hin jibbine Imaama godhannee jala deemna.

Kanaaf Qabrii ziyaaruun hoggaa karaa Rasuulaa s.a.w qunname faayidaa qaba. Sanirraa:

1. Jecha Rasuulaa s.a.w hojirra olchuudha.

2. Akhiiraa yaadachuudhaan gama Rabbii deebi’uudha.

3. Nama du’ee qabrii jiru saniif Rahmata Rabbii Isaaf kadhachuudha.

Kuni Karaa Islaamaati.

4. Sunnaa Rasuulaa s.a.w waan hojiirra olchaniif sawaaba Rabbiirraa ni argatan.

Kuni karaa jaalatamaadha. Muslimoonni durirraa hanga ammaa irratti waliif galanii itti dalagatan.

2. Ziyaaraa Qabrii dhowwamaa (jibbamaa) bakka sadihitti qoodama.

1. Ziyaaraa haraamaa: kunis Qabrii dhaqanii irratti booyuu fi haccuu ifirratti dhoosanii qooma If tumaa irratti booyuudha. Kana Rasuulli s.a.w irraa dhorgee jira.

2. Ziyaaraa Bid’aati (kan guyyaa keessaa uumame): kunis Qabrii biratti salaatuuf, du’aaii qabrii biratti godhachuuf, Qur’aana achitti qara’uuf dhaquun karaa Rasuulaa s.a.w irraa waan argamee miti. Qabrii biratti akka waan Ibaadaan haalaan qeebalamtuu godhanii dhaquun bid’aadha.

3. Ziyaaraa shirkiidhaa: kunis Ziyaaraa qabrii dhaquudhaan Qabrii gabbarani. Qabrii ykn Abbicha Qabrii keessa jiruuf Salaatuu, qaluu, kadhachuu, silata Isiif godhuu, furmaata rakkoo isarra barbaaduu, nuuf dirmadhu je’anii itti waywaachuu, Rabbitti nuuf iyyadhu je’anii qabriitti himachuu fii wanni akkanaa hundi shirkiidha.

Qabriif sujuuda bu'aa jira.

Rabbii achitti waan biraa yaammachuun, kadhachuun, qaluun shirkiidha. Islaamni amantii Towhiidaati, Rabbi qofa gabbaruutti nama yaama.

قُلِ ادْعُوا الَّذِينَ زَعَمْتُم مِّن دُونِ اللَّهِ لَا يَمْلِكُونَ مِثْقَالَ ذَرَّةٍ فِي السَّمَاوَاتِ وَلَا فِي الْأَرْضِ [سبأ: 22

“Je’i! kadhadhaa (yaammadhaa) warra kijibaan Allaahaa achitti yaammattan san, samii (turban) fi dachii keessatti madaala mixii (atamii) tokkoo hin handhurfatan (hin qaban).”

Qur’aana Suuraa Saba’: 22

Rabbiin Isa malee wanni biraa takka faayidaa namaaf fiduu akka hin dandeenye addeessee jira.

Garaagarummaan Ziyaaraa karaa godhamaa fii haraamaa akka agartan kana Ifaa fii bilisaan addaan bahee jira. Wanni qabrii Ziyaaraniif nama du’eef Rabbi kadhachuu fii akhiiraa yaadachuudha.

Ahbaashiin Ziyaaraa qabrii hoggaa je’an qabrii kadhachuu fii isiif qaluudha baanan. Yoo balaan argamte, Roobni dide, dhukkubni biyya weerare qabriif qaluu fii qabrii kadhachuun rakkoo hunda nurraa deebisa jechuu amanan. Kuni Ziyaaraa osoo hin taane, Qabrii gabbaruudha.

Namni mataan fayyaa qabuu, beekaa fii wallaalaan hundi Rabbii achitti waan biraa kadhachuun shirkii tahuu ni beeka, garuu hoggaa maqaa irraa jijjiranii Ziyaaraa fakkeessan namoota wallaalaa karaarraa jallisuun ni mala.

Kanaaf Ahbaashiin kijibduun qabrii ziyaaruu Wahbiyyaan haraama jetti hoggaa siin je’an Ziyaaraan Isaan baanan maal akka tahe amma bartee jirta. Atis kijibdan yaa Ahbaashii kijibduu! qabrii gabbarruun Shirkiidhaa, Ziyaaraan qabrii karaa qajeelaadha je’iin.

Ahbaashiin qabrii Gabbaruu keessa achi kuttee, biyyee qabrii Sheeka Isaanii Abdullaahi Hararii mana kaayyachuun balaa hunda namarraa deebisa je’anii akka biyya Awstiraaliyaatti gurguran namni achii jiru tokko naaf himee jira. Qabrii awliyaa tan Isaan je’anii gabbaran san hunda biyyeen qabrii sanii qorichaa jechuun wallaalaa namaa gawwoomsanii itti gurgiratan.

Ziyaaraan Qabrii tan Isaan baanan kunoo akkana.

Yoo Ziyaaraa Qabrii nu dhorgan je’an, Shirkii nu dhorgan jechuutti hiikkadhaa.

Rabbiin ummata Qabrii Gabbarutti nama yaamu kanarraa nu haa baraaru.

Aamiiin.